الجزء الثآني من سلسلة العنآية والإهتمآم : العنآية باليدين

الجزء الثاني من سلسلة :
( كيف تبدأين برنامج عنآية متكآمل )

لو ماشفتو الجزء الأول حسيب الرابط هنا! :)

"أغششكم ؟ حيكون عن البشره" *.*

❣

❣

❣

أول شي مرره حابه أعتذر عشاني قلت كل شهر باذن الله حنزل جزء جديد ولا نزل شي!! بس حبيت آخذ وقت كافي الصراحه عشان أقدر أتكلم فعلا عن كل شي سويته ونفع..! 

+

رمضآن مبآآرك علينا وعليكم ياارب ☾ 

✿.✿

أكثر شي يبغاله Extra care أو اهتمام شديد هيا اليد..حرفيا كل شي تسوينه بيدك! سواءا كان من ناحية شغل البيت أو الاشياء الثانيه..وكثرة غسيلها يخليها جافه طبعا! وطبعا لازم تتغسل كثير .

نفسي أقولكم أبدا لا تشتغلي إلا وانتي لابسه Gloves أو قفازات عشان تحمي يدك من المواد الكيميائيه الموجوده في أغلب الصوابين + من التراب لو كنتي بتمسحي شي ، وحرفيا من كل شي يضر اليد..بس مااقدرر :( لاني مو كذا :| 

النقطه هذي كانت صعبه عليا! ليه ؟ زمان كنت ماشتغل إلا وأنا لابسه قلوفز بس بعدين حسيت أسرع لمن أشتغل بيدي ، فـ ع طوول سحببت :|

عارفه إنه شي مرره سيء بس مرره ماقدرت ألتزم بالنقطه هذي!

ماقولكم مالبس للأبد..بس مرات ألبسها ومرات لا! وللاسف غالبا لا :(

❣

❣

❣

نبدأ في خطوات العناية !

أول شي تحتاجيه :

- غسول أو صابون معين خاص باليدين ، مثلا زي غسول اليد من بودي شوب! مرره أحب هذا الغسول وحرفيا كل مايخلص ع طوول أشترريه.

- مقشر : لو ماعندك مقشر جاهز ممكن تسوي واحد بنفسك!

كيف تسوينه ؟ 

جيبي علبة كريم فاضيه وحطي فيها ملعقة كبيره سكر + ملعقة كبيره زيت اللوز بما إنه يناسب البشره بشكل عام + شوية ليمون + ملعقه كبيره عسل !

وحطيهم في المايكرويف 5 ثواني.. وبعدين حركيهم مزبوط وابدأي استخدميهم ع طول 

خذي وقتك في التقشير وسوي مساج خفيف ليدك برضو ، بعدين سيبيه تقريبا ربع ساعه أو نص ساعه لو كنتي مره فاضيه xD وبعدين غسليه :

ماقدر أوصفلك قد أيش يدك حتكون ناعمه ونظييفه مررره بعد التقشيرر :) 

بعد كذا رطبيها بكريمك الخاص ، وخلاص يسير قشريها مره في الأسبوع!

كنت أستخدم مقشر خاص باليد من بودي شوب بس قطعوه من زمان :( مرره مدري ليه قطعوه ! كنت مره حابته .

- نجي للترطيب : أهم خطوووه ، دائما حطي كريمات الترطيب حقتك في كذا مكان! واحد مثلا في الكومدينه جنبك ، وواحد في المطبخ ، وواحد مثلا في الصاله ! عشان ماتنسين أو تكسلين مثلا، يسير فين ماتروحين حيكون في وجهك xD

حتى الكريمات الخفيفه حاولي تختاري اللي يكون فيها نسبة بسيطه من زبده الشيا أو زبدة الكاكاو ، المهم يكون فيها زبده بس بنسبة بسيطة بما إنه كريم ترطيب عادي..!

+ طبعا لازم يكون عندك زبده أو زيت غير كريمات الترطيب اليوميه .

كيف حستخدمي الكريمات هذي كلها؟

دائما في النهار 

آستخدمي كريمات ترطيب خفيفه شويا بما إنك حتستخدمي يدك كثير، فـ مو حلو إنك تستخدميها وانتي حاطه زبده مثلا ! حتدبق يدك كثير وكمان حتطبع الزبده في الاشياء اللي حتلمسيها زي شاشة الجوال مثلا :|

عشان كذا في وقت النهار خلي كريماتك خفيفه ومو مشكله كل فتره وفتره 

أو متى ماحسيتها جافه حبتين حطي كريم ثاني.

وفي الليل طبعا : 

يجي وقت الزبده ، لو يدك مره جافه مثلا وفيها شوية قشور بسبب الجفاف > جيبي زيت "سواءا كان زيت اللوز أو زيت جنين القمح أو زيت جوز الهند! كلها تنفع وتعتبر زيوت تجميليه ومفيده كمان ، وحطي كم نقطه منه مع الزبده وادهني فيه يدك.

ولو يدك مو جافه يسير تقدري تستغني عن الزيت.. أو انك تعتمدي الطريقه هذي مره كل شهر أو كل أسبوعين .

- آخر شي : اللي هيا الماسكات .

مرره شي لطيف وجميل كل فتره وفتره تستخدمي ماسك ليدك :) 

أنا اللي مجربته من ذا فيس شوب ، جونتي وجوته كريم : 

البسه وأسوي مساج خفيف ليدي وأخليه تقريبا 10 دقاايق وارميه لأنه يستخدم مره وحده بس..سعره رخيص أتوقع ب 10 أو 12 أو اذا مره 15..

❣

❣

❣

الصور هذي لكريمات أستخدمتها قبل كذا وحبيتها!

جربوها لو حابيين :)

❣

❣

❣

وبسس..أخيرا نزل الجزء هذا :) 

< لو جربتي كريمات ليدك ونفعت معاك وحابتها بليز اكتبيها في الكومنتس ، جدا حكون حابه أجربها أنا أو غيري :) !!

* ملاحظه صغنونه * 
لو حابيين تتعرفو عليا أكثر تابعوني ع الإنستقرآم ✿.✿
حيكون فيه شوية يوميات ، حنزل فيه كمان تحديثات لو نزلت بوستات جديده ، وكمان أبغا أضيفكم وأتعرف عليكم ياخي :")
ماحيكون شي مرره رسمي والصور ماحتكون مرره احترافيه :| أبغاه يكون بسيط ولطيف كذا! ❤