كيف تبدأين برنآمج عنآيه متكآمل ؟ part 1

< كيف تبدأين برنآمج عنآيه متكآمل >

أول سلسه أسويها :) 

البوست هذا حيكون مقسم لـ 5 أجزآء ! وكل شهر حينزل جزء من الأجزآء 
ان شاء الله!
\

الأجزآء كلها حتكون عن العنآيه طبعا! :)

بس خلال الشهر حتنزل بوستآت منوعه ومختلفه ماهي دآخله ضمن السلسه هذي. 

أوكي يلا ندخل في المهم !!

- بوست اليوم حيكون عن أول جزء من السلسله وهوا :

* كيف تبدأين روتينك الخآص للعنآيه ببشرتك...!

كثيير بنآت نفسهم يبدأو روتين معين يمشو عليه بس ماهم عارفين كيف بالزبط يرتبو 

أو على أي أسآآس يشترو المنتجآت وهيك .

أهم شي قبل كل شي طبعا : آعرفي نوع بشرتك .

 لأنو كل بشره لها خط عنايه مختلف تماما عن البشرآت الثانيه .

حكتبلكم الحاجات الأساسيه اللي لآزم تشتريها , وطبعا تقدري تشتري أكثر

بس حتكلم عن الأساسيات فقط وبالترتيب 
يعني أول شي حتبدأي بـ :

1- غسول :

الغسول شي مهم تستخدميه كل يوم .

2- تونر :

التونر وظيفته يقفل المسآمات وينظف البشره كمان.
ومهم جدا تستخدميه بعد المآسك :
لانو المآسك ينظف بشرتك تنظيف عميق ويفتح لك المسامات بما انو 
نظف البشره , فـ حتقفليها بالتونر .

لكن \ مو شرط تستخدميه كل يوم لأنو كثرة استخدامه تكثر المسام.

مثلا يوم واحد في الآسبوع لاتستخدميه.

3- كريم مرطب للنهآر :

بالنسبه للبنآت اللي بشرتهم دهنيه مآحيقدرو أبدا يستغنو عن كريم النهار مثلا أو الليل

ويسيرو يستخدمو كريم واحد لليل والنهار مثلا.....ليه ؟ لأنو لازم كريم النهار

تكون خامته جل أو خفيفه مره عكس كريم الليل واللي المفروض يكون شويا ثقيل .

لكن لو بشرتك جآفه ممكن تستغني عن واحد من الاثنين .
يعني ممكن تشتري كريم مناسب لبشرتك طبعا ويسير تستخدميه مرتين في اليوم .

4- كريم مرطب لليل :

كريمات الليل مهممه جدددا!
هيا الليي فعلا تعطيكي نتآيج مرضيه وكويسه .
لأن بشرتك حتتشرب الكريم مزبوط طول مانتي نآيمه .

5- مآسك :

نجي للمآسكآت , لازم يكون عندك مآسك تستخدميه مره وحده في الأسبوع .
بغض النظر عن نوع بشرتك : سوآءا كانت جافه أو مختلطه أو دهنيه.

حتلاقي ماسكات مناسبه لك مهما كانت بشرتك زي ماقلت .
 وفيه كذا نوع للمآسكآت :
- المآسك اللي يكون في علبه مثلا
- والمآسكات اللي تجي ع شكل مناديل.

لكن لو تبغين الأهم : 
طبعا المآسك اللي يجيكي في علبه مو اللي يجي ع شكل منديل لانو هذا النوع يستخدم مره وحده ويترمي .
بينما اللي في علب يجلس معاكي وقت أطول وغير انو فعآآل جددا في تنظيف البشره
ويسآعد كمان في التخفيف من الحبوب والبثور ويساعد في تصفية الوجه مع الوقت .
يعآلج مشآكل الوجه بشكل عآم .

أما المآسكات اللي ع شكل منآديل :

هذي تعتبر ماسكات سرييعه وتعطي ترطيب فقط . لكن مع الوقت والاستمرار عليها فعلا راح تتحسن بشرتك.
بس ماتنظف البشره تنظيف عميق ولا تنظيف بسيط لأنها مخصصه للترطيب غالبا.
فتعتبر شي كمالي . لكن الماسك الأول يعتبر ضروري يكون عندك.

5- كريم مرطب للعين :

الخطوه هذي مهمه جداا , البشره اللي تحت العين مرره رقيقه ويبغالها آهتمام مستممر .
لو مآهتميتي فيها حتسير المنطقه جافه مره ولمن تحطي الكونسيلر ع طول راح يتشقق معاك 
يعني حيكون شكل منطقة الهالات مره سيئ , ومع الوقت حتطلعلك حبوب صغيره كثييره.
<< وهذا الشي فعلا سار لي شخصيا :( 


* الزيآدات او الكماليات اللي ممكن تشتريها :
- ماسك للعين 
- مآسك للشفايف 
- سيروم للوجه 
- كذا نوع من المآسكآت 
- مقشر للوجه < مع انو شي حلو كمان ..

بس عشانك مبتدئه لاتكثري في المنتجآت عشان تستمري وماتطفشي.
ومثلا بعد شهر أو شهرين آشتري المقشر . وآستخدميه مره في الأسبوع
أو مرتين اذا كانت بشرتك دهنيه..


××× ملآحظه بسيطه ×××

احرصي مرره انو المنتجآت تكون تـنآسبك عشان لاتضرك قبل لاتفيدك.
استمري ع روتينك ولا تقطعيه أو تكسلي أبددا , فكري في شكلك في المستقبل أو بعد كم سنهكيف حيكون لو فعلا ماهتميتي :( 

* * *

ولو حآبين تعرفو روتيني اليومي حسيب الروآبط هنا :
الأول  | الثآني


* ملاحظه صغنونه * لو حابيين تتعرفو عليا أكثر تابعوني ع الإنستقرآم ✿.✿
حيكون فيه شوية يوميات ، حنزل فيه كمان تحديثات لو نزلت بوستات جديده ، وكمان أبغا أضيفكم وأتعرف عليكم ياخي :")
ماحيكون شي مرره رسمي والصور ماحتكون مرره احترافيه :| أبغاه يكون بسيط ولطيف كذا! ❤